Türkmən ədəbiyyatının klassiki, məşhur filosof-şair Məhtimqulu Fəraqi türkmənlərin “göklən” boyunun “gərkəz” tayfasının “qışıqlar” tirəsindəndir. O, 1724-cü ildə Türkmənistanın cənub-qərb hissəsində, İran sərhədinə yaxın, Ətrək çayı ətrafındakı Qarrı Qala əyalətinin Gürgən şəhəri ətrafında yerləşən Hacı Qovşan kəndində (indi İran ərazisi olan Gülüstan əyalətinin Türkmən Səhrasında Günbəz Kavus şəhərində) ziyalı ailəsində anadan olmuşdur. Onun atası məşhur türkmən şairi Dövlətməmməd Azadidir (1700-1760). Anasının adı Orazgül olmuşdur.
